Rreth 103 mijë anëtarë me të drejtë vote të Partisë Demokratike pritet të votojnë nesër për kreun e kësaj force politike. Në garë janë Lulzim Basha, i cili ndodhet i pari në fletën e votimit si dhe Eduard Selami që ndodhet i dyti në fletën e votimit. Por duket se disa nga anëtarët e PD-së kanë “votuar” që sot,pasi kanë treguar votën dhe fletën e votimit në rrjetet sociale.

“Nesër vota ime shkon per #LulzimBashen”- shkruan në ‘Facebook’ anëtari Evaris Prishta.

Por ka edhe nga ata që shprehen të pakënaqur me fletën e votimit dhe thonë se ajo nuk ka numër serie.

“Rritet demokracia e brendshme e PD! Fleta e votimit per kryetar nuk paska numer serie. Por meqe z. Basha qenka ne vend te pare megjithese i fillon emri me L qe ne alfabet eshte pas germes E, ti kishin vene nje x qe ne shtypshkronje e te mos kishin lodhur antaresine”- shkruan në ‘Facebook’ Gent Kaprata.

Kujtojmë se nesër zgjedhjet do të zhvillohen në mbi 60 degë, ndërsa në mbarë Shqipërinë do ketë 72 qendra votimi. Si Basha ashtu edhe Selami do të ketë vëzhgues në çdo komision votimi.

Pas mbylljes së votimit numërimi i fletëve të votimit do të bëhet në selinë qendrore të PD-së.