Bashkia e Tiranës e ka kthyer vëmëndjen nga zona e “Shallvareve”.

Blloku i banimit në këtë zonë,  në Njësinë Administrative Nr.10 në Tiranë ka marrë një pamje të re dhe punimet janë drejt fundit.. Siç bën të ditur kjo Bashki, po zbatohet në gjithë zonën projekti i rikualifikimit urban, i cili parashikon ndërhyrje në gjithë rrjetin e nëndheshëm, si dhe në infrastrukturën rrugore, trotuare, ndriçim etj.

Kryetari i Bashkisë, Erjon Veliaj pasi ka parë nga afër zbatimin e projektit në terren si dhe cilësinë e punimeve, theksoi se kjo është një nga zonat që pavarësisht se është në zemër të Tiranës ka qenë e braktisur nga investimet.

“Jam shumë i kënaqur me cilësinë e punës në të gjithë zonën e “Shallvareve”, kemi rehabilituar tre blloqe. Këtu ka qenë një gjiriz i vërtetë, një kënetë. Mbaj mend baltën deri në gju kur kam qenë nxënës këtu afër”, tha Veliaj.

Më tej, duke specifikuar ndërhyrjet që po bëhen, ai ka siguruar se tashmë kjo do kthehet në një nga zonat që ofron të gjitha standardet e një zone urbane, dhe për këtë ai ka falenderuar bizneset dhe banorët e kësaj lagje për bashkëpunimin në lirimin e hapësirave për të mundësuar rrugë e trotuare më të gjera.

“Sot kemi bërë kanalizimet, kemi parkingjet e dedikuara, ndriçim, gjelbërim. Falenderoj bizneset sepse përtej tahmasë për të kapur edhe pak më shumë territor, zgjodhën qytetarinë. Sot, edhe biznesi i tyre do ecë më mirë, sepse ndodhet në një vend të bukur e të sistemuar. E di që në një qytet me një dendësi jashtëzakonisht të madhe nuk ka zgjidhje perfekte, por unë besoj që kur të gjithë lëmë pak nga vetja jonë për të mirën e përbashkët, jemi në një situatë më të mirë. Sot, kjo zonë realisht mund të quhet një zonë e zemrës së Tiranës dhe në vend që të kthenim zonat e Tiranës qendër si periferi, sot po bëjmë zonat e periferisë me të njëjtën cilësi që po punojmë edhe këtu në zonën e “Shallvareve”, u shpreh Veliaj.

Kryetari i Bashkisë bëri të ditur se ky investim do t’i japë mundësi Bashkisë së Tiranës që të pilotojë në këtë bllok edhe projektin tjetër, atë të parkimit të dedikuar.

“Më vjen mirë që ky do të jetë piloti ynë i dytë, për projektin e parkimit rezidencial. Banorët, në bazë të listës që siguron administratori i pallateve, do të kenë pullën e tyre për makinën ku ata ta kenë të garantuar parkimin; nëse ka parking të mbetur atëherë mund ta përdorin edhe të tjerët, por një banor nuk duhet t’i vijë lagjes vërdallë për t’u siguruar që ka vendin e vet të parkimit dhe sigurisht që për distancat e vogla ne mbetemi një bashki që inkurajon ecjen me biçikleta, por për njerëzit që duan të përdorin mjetin e tyre të punës, makinën, do të garantojmë parkimin e tyre në këtë pallat”, tha kryetari i Bashkisë së Tiranës.

Bashkia bën me dije se, nëpërmjet këtij projekti janë trajtuar pjesët mes pallateve ndërmjet rrugës “Sami Frashëri” dhe Blv. “Gjergj Fishta”.

“Ai mundëson shtrimin e rrjetit të kanalizimeve, energjetik, telefonisë dhe internetit, si dhe rrugë e trotuare të reja dhe të zgjeruara. Gjithashtu falë lirimit të hapësirave të zaptuara si dhe të riorganizimit të zonës është mundësuar edhe sigurimi i 80 vendeve të reja parkimi. Në zonat mes pallateve janë krijuar lulishte dhe mbjellja e bimëve dekorative”.