Kryetari i Partisë Demokratike, Lulzim Basha ka hapur fushatën elektorale në Gjirokastër, ku prezantoi kandidatët e opozitës për deputet. Basha sulmoi qeverinë Rama, duke e cilësuar si “Qeveria e tepsisë”, që është përçarë dhe tashmë petët e lakrorit kanë dalë në shesh.

“E bashkuar opozita e përçarë qeveria e tepsisë, petët e lakrorit kanë dalë në shesh. Ne jemi të bashkuar, ata të përçare. Ne duam ndryshimin, ata duan ta mbajnë kështu siç është”, tha kreu i PD-së.

Më tej kreu i selisë blu bëri një panoramë të gjendjes ekonomike në vend, duke theksuar se ekonomia është në ditët e tij më të zeza.

Lideri i PD-së, vijoi akuzat ndaj kryeministrit, duke thënë se rrogat e shqiptarëve janë ulur, faturat e energjisë janë rritur në stratosferë, ekonomia është në ditët më të zeza dhe gjithë Shqipëria u mbush me drogë. “Ti Edi Rama i le shqiptarët me gisht në gojë”,- vijoi Basha.

Ai e foti Ramën në një debat live, dhe u shpreh se pyetja e parë që do i bënte, ishte: Ku janë 300 mijë vendet e punës dhe shëndetësia falas?

Eja në debat, eja në debat, është kulturë demokratike, të debatojmë përpara shqiptarëve. Cakto orën dhe vendin dhe të hapim debatin pa teatër kukullash.