Lulzim Basha u shpreh i gatshëm të ulet në një tryezë me Edi Ramën për reformën në drejtësi. I vetmi kusht për këtë takim për kryedemokratin ishte të mos kishte kushte.
E menjëherë ka ardhur reagimi Kryeministrit Edi Rama, i cili nëpërmjet një letre drejtuar Drejtoreshës së Kabinetit të Partisë Demokratike shpreh gatishmërinë për tu ulur në tryezë ditën e shtunë.
“Kryeministri është i gatshëm të takohet me Kryetarin e Partisë Demokratike që nesër në orën 11:00. Zoti Basha është sigurisht i mirëpritur të caktojë orën e takimit në çdo rast. Duke qenë se vendi i takimit është lënë në zgjedhjen e Kryeministrit, ai mund të zhvillohet në Sallën e Hartave, në godinën e Këshillit të Ministrave”.

Kur ende nuk kishin kaluar as 60 minuta ka ardhur dhe përgjigjja e selisë blu. Në letrën e Drejtoreshës së Kabinetëti të Partisë Demokratike thuhet se takimi mund të zhvillohet më datë 1 Qershor, pasi këto ditë lideri i demokratëve ka agjendë jashtë vendit.

“Për shkak të një agjente ndërkombëtare të konfirmuar më parë, Kryetari Basha është i mundur të realizojë takimin duke nisur prej ditës së mërkurë, datë 1 Qershor 2016. Për ditën, vendin dhe formatin e takimit jam e gatshme të vendim kontak menjëherë me ju për të nisur rakordimet e nevojshme”.

Por formati i takimit duket se është përzgjedhur parapakisht nga shefi i qeverisë, i cili thotë në letër:
“Kryeministri do të jetë i shoqëruar nga Kryetari i Komisionit parlamentar për Reformën në Drejtësi, Z. Fatmir Xhafaj, si edhe nga Kryetari i Komisionit parlamentar për Reformën Zgjedhore, Z. Bashkim Fino. Zoti Basha është mëse i mirëpritur të vijë i shoqëruar sipas dëshirës së tij.
Por për cilat tema është i gatshëm të dialogojë Edi Rama?
“Në kuadër të këtij takimi, Kryeministri do të dëshironte të trajtonte sëbashku me Kryetarin e Partisë Demokratike, çështjen e Reformës në Drejtësi, atë të Reformës Zgjedhore dhe çdo çështje tjetër me rëndësi dhe interes të përbashkët”.