Të gjitha ato kompani që kanë më shumë se 100 punonjës në strukturën e tyre do të duhet të ngrenë pranë çerdhe dhe kopshte për fëmijët.

Një kërkesë e tillë është bërë nga kreu i Bashkisë Tiranë Erion Veliaj.

Një masë e tillë sipas kryebashkiakut do të ulte fluksin e fëmijëve në institucionet publike.

“Këtë vit do të sjellim një risi: Siç e kërkon ligji dhe siç është tradita në të gjitha vendet e BE-së, kompanitë që kanë një numër të caktuar punonjësish, mbi 100 punonjës, si kompanitë e telekomunikacionit, bankave, të fillojnë të instalojnë në mjediset e tyre çerdhe dhe kopshte. Është një mënyrë për t’u siguruar që prindi që punon e ka shumë të afërt vendin ku po rritet fëmija i tij, por edhe për t’i hequr një ngarkesë qytetit” tha Veliaj

Deklaratat e kryebashkiakut u bënë gjatë inspektimit të punimeve për shtimin e kapacitetit nga 150 në 250 fëmijë, në çerdhen “Pranverat” në Njësinë Bashkiake nr. 10.