Ethet e garës politike për zgjedhjet lokale të 15 tetorit kanë filluar të ndihennë Maqedoni. Partitë kryesore maqedonase LSDM dhe VMRO po tentojnë të joshin shqiptarët duke synuar votat e tyre. Retorika e dy partive është zbutur shumë , sidomos VMRO-DPMNE, e drejtuar nga Nikolla Gruevski e cila ka lëshuar deklarata të ashpra për shqiptarët. Gruevski thotë se oferta e tyre, përkushtimi, përgjegjësia dhe dija do të jenë përgjigja më e mirë për kaosin dhe pasigurinë që e ka shkaktuar LSDM-ja. Lidhja Social-demokrate që drejton Qeverinë, edhe në pushtetit lokal do të vazhdojë me retorikën e zgjedhjeve të fundit parlamentare duke u angazhuar për një shoqëri për të gjithë. LSDM-ja pretendon që këtë koncept ta zhvillojë në partneritet me BDI-në e Ali Ahmetit, me të cilën është në koalicion qeveritar. “Ne ofrojmë zgjidhjet më të mira, si me kandidat ashtu edhe me programe. Ne si partner qeveritar do ta mbështesim njëri-tjetrin në disa komuna”,-deklaroi Zaev. Partia e tij ka nxjerrë edhe kandidatë shqiptarë në disa komuna.  Fushata elektorale për zgjedhjet e 15 tetorit zgjat 20 ditë. Në garë për drejtimin e 80 komunave dhe Shkupin si njësi e veçantë e pushtetit lokal marrin pjesë 19 parti politike dhe koalicione si dhe disa lista të kandidatëve të pavarur për këshilltar komunal.