George Clooney ka dalë hapur kundër Donald Trumph. Në një intervistë për “The Guardian”, aktori i famshëm ka qenë i drejtpërdrejtë në akuzat e bërë kundër Donald Trumph. “Trump është një oportunist, më keq akoma një fashist, një fashist ksenofobik”, thotë ai.

“Mund t’u besojmë amerikanëve se do të bëjnë zgjedhjet e duhur pasi të kenë shteruar të gjitha mundësitë e tjera”, citon ai. Me këtë ai i referohet indirekt betejës së mundshme në finale mes Trump dhe Clinton, ku sigurisht që e sheh veten në krah të ish-Sekretares së Shtetit, megjithëse aktualisht simpatizon rivalin e saj brenda demokratëve.

“Më pëlqen Bernie Sanders. Më bëhet qejfi që ai është në këtë garë sepse po detyron që të flitet për gjëra që nuk flitet në politikën amerikane; për hendekun dhe pabarazinë mes të pasurve dhe të varfërve që vazhdon të thellohet çdo ditë”, thotë Clooney.

George Clooney njoftoi se është duke mbledhur fonde për Hillary Clinton, për ta ndihmuar atë në fushatën finale përballë republikanëve.

Në 2012 mblodhi më shumë se 12 milionë dollarë brenda një nate për të financuar fushatën e Barack Obamas në betejën e tij për t’u rizgjedhur në krye të Shtëpisë së Bardhë dhe kjo e bën lehtësisht të kuptueshme se cilin krah mbështet sot.