Ndërsa presioni vazhdon të ndërtohet në ishujt Egje me emigrantë pa dokumente që vijnë nga Turqia fqinje, komisioneri evropian i migracionit Dimitris Avramopulos u ankua të martën lidhur me një propozim të bërë nga Presidenti i Këshillit Evropian Donald Tusk për heqjen e kuotave të detyrueshme për zhvendosjen e azil kërkuesve në të gjithë BE. "Ekathimerini" shkruan se "duke folur në Strasburg, Avramopulos përshkroi propozimet e Tusk si "të papranueshme" dhe "anti-evropiane". "Ai mohon, ai injoron, të gjithë punën që kemi bërë gjatë tre viteve të fundit," tha ai, duke shtuar se propozimi i Tusk gjithashtu minon "një nga shtyllat kryesore të projektit evropian, principet e solidaritetit". Duke folur përpara një samiti të planifikuar të Bashkimit Evropian mbi emigracionin të enjten, komisioneri tha se "solidariteti nuk mund të funksionojë kështu". Reagimi erdhi pasi autoritetet greke luftuan për të lehtësuar presionin mbi kampet e mbipopulluara në ishujt e Egjeut dhe për të përmirësuar kushtet e jetesës në përgatitje për fillimin e përkeqësimit të motit. Që nga mesi i tetorit, 5.701 emigrantë janë transferuar nga ishujt e Egjeut në objektet shtetërore në kontinent. Prej tyre, 3,589 u shpërngulën nga Lesvos, ku qindra emigrantë kanë jetuar në çadra jashtë kampit të Moria. Autoritetet në Lesvos hoqën një bllokadë në dërgimin e 50 shtëpive të kontenierëve të transportit të destinuara për në kampin Moria të martën herët. Njësitë e parafabrikuara ishin në një traget në portin e Mitilenës që nga e hëna në mëngjes, kur autoriteti komunal urdhëroi shoferët e kamionëve të formonin një bllokadë që pengonte anijen e qeverisë që të shkarkonte ngarkesën e saj. Masa erdhi pasi qeveria siguroi kryetarin e Lesvos Spyros Galinos se njësitë nuk do të përdoreshin për të krijuar një kamp të ri në ishull, por vetëm për të akomoduar refugjatët që aktualisht jetojnë në tenda.