Lëvizja Socialiste për Integrim vijon të dielën ditën e dytë të punimeve të Konventës Zgjedhore, ku pritet të zgjidhen forumet drejtuese të partisë. Deputetë, ministra dhe përfaqësues të LSI-së morën fjalën në këtë Konventë, duke renditur disa prej arritjeve, por edhe sfidave që dalin para në sektorë të ndryshëm për zhvillimin e vendit.

Duke folur për mediat, në kuadër të kësaj Konvente, kreu i Grupit parlamentar të Lëvizjes Socialiste për Integrim, Petrit Vasili, u shpreh se “kjo parti ka treguar qasje moderne në politikën shqiptare dhe sheh përtej interesit vetjak, duke iu drejtuar interesit të qytetarëve”.

Ai tha se, “këtë vit, LSI ka futur procesin e votimit elektronik”. Sipas Vasilit, entuziazmi është tejet i lartë. “LSI ka dëshmuar se është një forcë politike që sheh përtej politikës së ditës, por i drejtohet interesit të qytetarëve. Politika jonë, shtoi Vasili është një politikë e mendjes së hapur”.

Panariti: Bujqësia, motorri i zhvillimit të vendit

Ministri i Bujqësisë, Edmond Panariti, në fjalën e tij gjatë Konventës së Lëvizjes Socialiste për Integrim u shpreh se, “bujqësia ka nevojë për një mbështetje reale”. “Nuk duhen fjalë dhe retorikë, por duhet të kalojmë në veprim. Ne si forcë politike, LSI, kemi bërë maksimumin tonë për t’i dhënë zhvillimin e duhur këtij sektori, por nuk mundet të mbetemi me kaq, pasi bujqësia është motorri i zhvillimit të vendit”, tha Panariti.

Ai në këtë kuadër kërkoi uljen e barrës fiskale ndaj këtij sektori.

Haxhinasto: Shqipëria me potenciale të mëdha zhvillimi

Ish-Ministri i Transporteve dhe Infrastrukturës, Edmond Haxhinasto çeli ditën e dytë të Konventës së Partisë Lëvizja Socialiste për Integrim.

Ai në fjalën e tij rreshtoi pikat kryesore mbi të cilat mbështetet platforma e LSI-së. Sipat tij, zhvillimi i vendit përmes strukturës dhe reformave cilësore është prioritare për këtë forcë politike, teksa shtoi se reforma zgjedhore sipas kërkesave të OSBE/ODHIR-it mbetet gjithashtu një objektiv i rëndësishëm dhe kërkesë e LSI-së.

Sipas Haxhinastos, puna e LSI-së bazohet tek dialogu, transparenca në vendimarrje. “LSI vazhon të jetë një forcë që ka në thelb të saj stabilitetin, ka mirëkuptimin dhe kërkesën e qartë për cilësinë e reformave. LSI kërkon një proces zgjedhor të bazuar në kërkesat e OSBE/ODHIR-it, LSI ka një vëmendje të jashtëzakonshme për reformën në drejtësi, si mundësi jetike, si rruga e vetme për të rritur zhvillimin e vendit për të garantuar të drejtën e patjetërsueshme të qytetarëve dhe investitorëve në një sistem demokratik”, tha ai.

Sipas Haxhinastos, LSI vlerëson se vendi ka një potencial të madh për zhvillim, në këtë drejtim duhet inovacioni, kërkimi shkencor të rritet në nivelin europian. “Ne besojmë se për të arritur objektivat tona, punësimi do të qëndrojë si prirje drejt zhvillimi të vendit”, tha Haxhinasto, i cili shtoi se në fokus janë dhe politikat fiskale të vendit, politika këto, që sipas ish-ministrit sjellin një dallim të rëndësishëm mes partive.

DITA E DYTË E KONVENTËS SË LSI-SË, PRITET ZGJEDHJA E FORUMEVE DREJTUESE

Lëvizja Socialiste për Integrim vijon sot ditën e dytë të punimeve të Konventës Zgjedhore, ku pritet të zgjidhen forumet drejtuese të partisë.

Nën moton “Një shans për të gjithë”, Lëvizja Socialiste për Integrim (LSI) mblodhi të shtunën Konventën Kombëtare Zgjedhore, në ambientet e Pallatit të Sportit “Asllan Rusi”. 3000 delegatët e Forumit më të lartë të kësaj partie do të zgjedhin komitetin e ri drejtues dhe kryesinë e re të LSI-së, që do e drejtojnë këtë forcë politike për katër vitet e ardhshme.

Konventës i janë propozuar për postin e Zv.Kryetarit të LSI-së, Petrit Vasili; për postin e Sekretarit të Përgjithshëm, Endrit Braimllari dhe kandidaturë alternative Dritan Ylli; për postet e nënkryetarëve të partisë, kandidojnë Luan Rama dhe Kejdi Mehmetaj, si dhe Silva Caka, deputete.

Një tjetër risi e Konventës Zgjedhore do të jetë miratimi në Statutin e partisë i krijimit të Kryesisë Ekzekutive të LSI-së, ku përveç Kryetarit të LSI-së, Sekretarit të Përgjithshëm, Zv.Kryetarit dhe dy N/Kryetarëve, do të jenë pjesë edhe Kryetari i Lëvizjes Rinore për Integrim dhe Kryetari i Lëvizjes së Gruas për Integrim.

Votimi në Konventën Kombëtare Zgjedhore do të bëhet në mënyrë të fshehtë dhe me sistem elektronik.

(el.sp/BalkanWeb)