Një çift të moshuarish kanë rënë pre e grabitjeve. Ngjarja e rëndë ka ndodhur në fshatin Zejmen të Lezhës. Sipas të dhënave të policies, katër persona ende të paidentifikuar, të maskuar dhe të armatosur, kanë hyrë nga dritarja e dhomës së gjumit në orët e para të mëngjesit ku kanë arritur të grabisin disa bizhuteri, 85.000 lekë të rinj dhe 2 mijë euro. Grabitja e sendeve me vlerë dhe e parave është kryer pasi 4 grabitësit kanë ushtruar dhunë mbi çiftin.
Policia thotë se kanë shoqëruar disa persona të dyshuar dhe po merren në pyetje, por ende nuk ka rënë në gjurmët e autorëve.
Mësohet se 58-vjeçari me inicialet P.P në momentin e ngjarjes ka qenë në gjumë, por është zgjuar nga zhurmat.
Në këtë moment grabitësit i kanë kërcënuar të moshuarit, si dhe kanë lidhur kryefamiljarin për të vepruar të lirë. Pas largimit të grabitësve të moshuarit njoftuan policinë. Uniformat blu të qytetit të Lezhës po punojnë për zbardhjen e plotë të kësaj ngjarjeje.