Shqipëria po promovohet shpesh nga mediet e huaja dhe së fundmi ka shkruar një nga portalet informative më të njohura në botë, MSN, që menaxhohet nga gjiganti i informatikës “Microsoft''. MSN liston vendet më të bukura për t’u vizituar.

Artikulli nis me qytetin e Beriatit. Ai vlerësohet si vendi i Trashëgimisë Botërore të UNESCO-s dhe është një nga fortesat më të vjetra në Europë të banuara deri në ditët e sotme. Një qytet tjetër pak i ngjashëm me Beratin është dhe Gjirokastra. E vendosur thellë në një luginë dhe e mbuluar me mjegull, Gjirokastra ka një nga kështjellat më të mirëmbajtura në Shqipëri që daton në shekullin e 12-të. Sipas artikullit për turistët që do të shkojnë në Gjirokastër, këshillojnë të vizitojnë shtëpinë e fëmijërisë së Ismail Kadaresë.

Duke vazhduar në jug të Shqipërisë janë vendet si Saranda, Himara, Dhërmiu dhe Vunoi. E mbushur gjatë viteve të fundit me ndërtime të reja që i kanë zvetënuar pamjen, Saranda ruan ende magjinë e qytezës së dikurshme, veçanërisht në fund të pranverës dhe në fillim vjeshtës.

Në listën e qyteteve që duhen vizituar bën pjesë dhe Korça. Arkitektura e Korçës është e frymëzuar nga stili francez. Shkodra, Thethi, Valbona, Butrini janë gjithashtu disa nga vendet që nuk duhet t’ju shpëtojnë pa i parë. MSN e mbyll listën e vendeve që duhen vizituar me Tiranën.

Për të gjithë ata që janë të interesuar për historinë interesante të kohëve të fundit, atëherë kryeqyteti shqiptar duhet vizituar patjetër.