Kryetari i grupit parlamentar të Lëvizjes Socialiste për Integrim, Petrit Vasili ka folur me tone të ashpra për zgjedhjen e Kryeprokurores së re, për seancën dhe protestën e së hënës.
Në rubrikën “Opinion” në News 24, Vasili tha se opozita nuk ka qenë kundër zonjës por ka qenë Kushtetuta kundër këtij procesi që sipas tij nuk e përcakton ligji.

“Ka qenë Kushtetuta kundër. Nuk mund të zgjidhej. Në parlamentin e Shqipërisë ka ndodhur një puç kushtetues. Kam dëgjuar plot analistë që shkruajnë broçkulla. Kushtetuta thotë qartë që mandatin e mbaruar të kryeprokurorit e konstaton KLP që nuk është ngritur. Mundësia e vetme për të pasur një kryeprokuror të përkohshëm është kur ndërpritet jo kur mbaron. Ka një parashikim të caktuar që thotë një nga prokurorët e vjetër, duke bërë vettingun mund të zgjidhet. Kemi thënë shqip kthehemi në Kuvend rregullojmë këtë gjë dhe zgjedhim një kryeprokuror të ligjshëm. Ky është i paligjshëm. Kemi dëgjuar me mijëra herë fjalën vetting. Nuk kam asnjë paragjykim për zonjën, as e njoh fare. Por ky kryeprokuror është aty pa vetting”, tha Vasili.

Deputeti i LSI-së tha se parlament ndodhi një puç kushtetutës duke shpjeguar edhe arsyet. Ai e cilësoi “pjellë antiligjore” kryeprokuroren e re. Për dhunën në kuvend, Vasili tha se e solli mazhoranca, ndërsa tregoi se ndaj kreut të Kuvendit Gramoz Ruçi ka një kallëzim në prokurori.

“Një pjellë antiligjore nuk më sjell asnjë besim”, tha Vasili.