Policia e Durrësit ka parandaluar një grabitje me armë gjatë natës së 30 marsit, duke arrestuar një të ri dhe shpallur në kërkim 2 bashkëpunëtorë.

Sipas të dhënave zyrtare, seksioni i Hetimit të Krimeve në Komisariatin e Policisë Durrës, në bashkëpunim me shërbimet e Policisë së Rendit ka marrë informacione se disa persona kishin planifikuar grabitjen me armë të një pike karburanti.

Menjëherë është organizuar puna dhe si rezultat i përdorimit të metodave speciale të hetimit është finalizuar me sukses operacioni i koduar “Ndjekja”.

Gjatë operacionit u bë e mundur kapja dhe arrestimi në flagrancë i autorit kryesor të dyshuar, shtetasit J.M., 26 vjeç, banues në Xhafzotaj, të cilit në momentin e arrestimit policia i gjeti dhe sekuestroi një armë zjarri automatike Kallashnikov model 56, një karikator me 22 fishekë, tre maska, tre palë doreza, tre aparate celularë dhe një thikë , sende këto që do përdoreshin për të realizuar vjedhjen me armë të karburantit.

Gjithashtu u shpallen në kërkim shtetasit Xh.M.,22 vjeç, banues në Delvinë dhe A.C., 21 vjeç, banues në Tiranë, pasi në bashkëpunim me njëri -tjetrin dhe shtetasin e arrestuar në flagrancë më datë 30.03.2019 gjatë natës kishin planifikuar grabitjen e një pike karburanti në qytetin e Durrësit.