Shpërthimi i fundit i virusit Ebola në Republikën Demokratike të Kongos, është më i keqi në historinë e këtij vendi. Në këtë konkluzion arriti Ministria e Shëndetësisë. Pothuajse 200 persona kanë vdekur vetëm për pak muaj ndërkaq mbi 300 raste të tjera janë konfirmuar se janë të infektuar me këtë virus. Programi i vaksinimit kundër Ebolës deri më tani ka përfshirë rreth 25 mijë njerëz.

Kongo ka vuajtur për shumë gjatë vite me jostabilitet dhe përpjekjet për të parandaluar përhapjen e këtij virusi janë penguar nga sulmet ndaj punëtorëve shëndetësorë.
“Deri më tani, 319 raste dhe 198 vdekje janë konfirmuar”, ka thënë Ministri i Shëndetësisë, Oly Ilunga.
Ky është shpërthimi i dhjetë i virusit të Ebolës në Kongo dhe më i keqi, që prej epidemisë së parë më 1976. Ebola është një sëmundje infektuese që përhapet përmes lëngjeve trupore, shkruan Newsbomb.al.
Simptomat e para të virusit janë të ngjashme me ato të gripit por më pas përcillen me vjellje, diarre, skuqje të lëkurës dhe me gjakderdhje të brendshme dhe të jashtme.